CEBU, Philippines - Napanglantawan nga mas luwas ang biyahe kun adunay built-in cameras sa sulod sa mga buses nga magbiyahian dinhi sa Sugbu.
Ang Regional Director sa Land Transportation Office (LTO) Raul Aguilos mibutyag sa diha nga nahinabi sa Banat News nga mas labing maayo kun mo-invest ang mga bus operators og CCTV cameras sa ilang sakyanan.
Matud pa ni Aguilos nga ma-monitor sa mga operators ang ilang sakyanan kun ugaling adunay mga daotang tawo nga nagsakay niini nga nagplano usab og daotan sa mga sumasakay.
“If they would invest for that, it would be a great help especially sa security sa mga pasahero nila,” pasabot pa ni Aguilos.
Ang Banat News nakighinabi og pipila ka mga commuters sila mihangop sa maong sugyot tungod kay aduna na kanila nakasinati ug nabiktima sa pagpanguot ug duna say gikawatan sa ilang bagahe.
Samtang ang presidente sa Cebu Provincial Bus Operators Association (CPBOA) Richard Corominas misaway hinuon sa maong sugyot tungod kay iyang napanglantawang hilabihan ka mahal nga investment ang maong mga ekipo.
“Heavy investment man gyud na, laliman ka ba gud og CCTV imong ibutang sa bus? I doubt nga mosugot ang mga operators ana,” pasabot pa ni Corominas.
Matud pa ni Corominas nga dili usab angayan nga ihatag pa ngadto sa mga operators ang responsibilidad ang pagpatuman sa peace and order kini tungod kay responsibilidad kini sa kapolisan.
Daghang mga bus pasaheroan sa Metro Manila ug sa Luzon ang migamit na niini tungod sa mga nagsunodsunod nga mga insidente sa pagpanulis ug lakip na usab nga magamit sa drayber sa ilang pagmaneho ang CCTV cameras nga nakatutok sa luyo kung sila moatras. (BANATNEWS)