Pipila ka mga dagkong dalan sirad-an

CEBU, Philippines - Aron pagtamod sa selebrasyon sa Earth Day karong adlawa sirad-an ang pipila ka mga dalan sa dakbayan sa Sugbo gikan sa alas-7 hangtod sa alas-10 sa buntag tungod sa pagahimuong Mass Bike Riding Activity.

Ang Cebu Extreme Bikers Union, Bike and Talk Friendship Club, Movement for Liable Cebu, Critical Mass Cebu ug 350.Org nangimbitar og mga cyclists ug supporters nga moapil sa maong kalihukan.

Tuyo sa grupo nga makahatag og dugang kaalam ngadto sa publiko sa kadako sa papel sa kinaiyahan sa paggamit og bisekleta ug ang pagbutang og mga bicycle lanes ug bicycle racks sa kadalanan.

Ang mga partisipante magtapok alas-7 sa buntag sa Plaza Independencia ug alas 7:59 sugdan ang pagtuyok sa mga siklista sa 20 kilometrong dalan padulong sa North Reclamation Area sa SM City Cebu, Mabolo, padulong sa IT Park sa barangay Apas, libot sa JY Square Mall sa Lahug subay sa Gorordo Avenue padulong sa Escario St. lahos sa Fuente Osmeña Rotunda lahos na ngadto sa Osmeña Blvd.balik sa Plaza Independencia.

Hinuon kun makalabay na ang mga siklista buksan og balik ang maong apektadong dalan.

Ang mga siklista mohapit usab sa Cebu Provincial Capitol ug Cebu City Hall aron iisa ang bandera nga adunay logo sa bike lanes nga nagpasabot nga kinahanglan na gyud nga adunay tukorong bike lanes sa kadalanan sa siyudad.

Sumala pa ni Vince Cinches sa 350.Org nga gusto nilang ipahibawo sa publiko nga ang kadalanan dili lamang para sa mga sakyanan nga de-makina.

Tumong sa kalihukan ang pagduso sa adbokasiya nga batasanon ang pagbisekleta. (BANATNEWS)