30 Adlaw eksperimento

CEBU, Philippines - Mga motorista maka U-Turn na sa Osmeña Blvd.

Tun-an sa City Traffic Office Management (CITOM) sa siyudad sa Sugbu pinaagi sa 30 ka adlaw nga eksperimento nga tugotan nga maka-U- Turn ang mga motorista diha sa Osmeña Boulevard agi pagsusi kung makatabang ba kining maong lakang sa mga motorista aron makadaginot og petrolyo.

Ang CITOM board pinangulohan ni Rafael Christopher Yap ug Chairman sa CITOM nga si Sylvan Jakosalem misugyot pinaagi sa usa ka resolusyon sa hunta nga ipatuman ang pagtugot nga maka-U Turn sa duha ka mga tumoy sa center (median) island atubangan sa dakong orasan sa Osmeña Blvd. sugod alas-10 sa gabii hangtud sa alas-6 sa buntag matag       adlaw.

Kini himuon sulod sa 30 ka adlaw nga matud pang Jakosalem susama sa gipatuman sa daghang mga dalan sa Metro Manila nga nakatabang sa pagpamenus sa gastos sa petrolyo sa mga motorista.

Matud pa niini kung makitang malampuson ug makatabang sa maong eksperimento ngadto sa mga motorista dugang mga dalan pa ang tugotang mamahimong maka-U Turn ang mga motorista.

Apan giklaro sa hunta sa Citom nga kung adunay mahitabong aksidente sulod sa 30 ka adlaw nga experimental period diha sa Osmeña Blvd. awtomatiko nilang hunongon ang maong eksperimento.

Ang maong resolusyon sa Citom gisumitir na ngadto sa buhatan nila ni Konsehal Richard Osmeña ug Augustus Pe.Jr. ug gitugotang ipatuman. (BANATNEWS)