e-Blotter sa Lapulapu gilusad

CEBU, Philippines - Suportado sa lokal nga kagamhanan sa dakbayan sa Lapulapu ang gilusad sa kapolisan nga Electronic Blotter (e-blotter) sa miaging adlaw. Si Senior Superintendent Rey Lyndon Lawas, director sa kapolisan sa maong dakbayan maoy nangulo sa paglusad sa maong programa nga gitambongan usab nila ni Senior Superintendent Agustos Marquez ug uban pang opisyal sa Police Regional Office (PRO) 7.

Si Mayor Paz Radaza nga mitambong sa maong kalihokan mipadayag sa iyang suporta sa maong proyekto sa kapolisan.

Si Senior Superintendent Lawas mipasalig nga ang mga polis nga gidestino sa 27 ka barangay sa dakbayan maoy mahimong dangpan sa mga molupyo sa matag higayon nga nanginahanglan kini og police assistance. Si ABC Federation President Leo Mercado mipadayag sa kalipay ug misaad nga mosuporta sila sa kapolisan ning maong programa.

Ang e-blotter sa kapolisan nga daan nang gisagop sa Cebu City Police Office, (CCPO) ug Mandaue City Police Office (MCPO) maoy mga bag-ong paagi sa kapolisan nga madali ang pagtala sa mga panghitabo sa tagsa-tagsa   ka lugar sa ilang hurisdiksyon. (BANATNEWS)