Suliran sa hot meat nagpadayon

CEBU, Philippines - Mipadayag og pagmahay ang mga mamuhiay og baboy gumikan sa kapakyas sa kagamhanan sa pagsanta sa palusot sa karne sa mga kamerkadohan dinhi sa Sugbo.

Matud pa ni Roland Tambago, presidente sa Central Visayas Pig Producers Cooperative nga desidido kaayo silang mga nagbaboyan sa pagtabang sa kagamhanan nga molambo ang industriya sa karne apan wala tagda sa goberno ang ilang hangyo. 

Miingon si Tambago nga dugay na nilang gihangyo ang mga otoridad nga santaon ang mga sindikato nga tigpalusot og karne sa kamerkadohan nga walay permiso.

Wala hinuon motumbok si Tambago og mga lugar nga gipalutsan og mga ilegal nga karne apan mitug-an kini nga makapamatuod siya niini. Apan dali kining gipanghimakak ni manlalaban Ronnie Silvestre , District Collector sa Bureau of Customs kinsa nagkanayon nga walay mga   karne nga makalusot sa mga pantalan dinhi sa dakbayan gawas kun mainspection na kini sa mga tinugyanan sa National Meat Inspection Service (NMIS).

Matud pa niya nga gawas lang kung may clearance sa NMIS, ang karne nga gikan sa laing lugar dili gyud mahabwa gikan sa barkong gikargahan niini tungod kay ipaubos man kini sa kurentina.

Sa bahin ni Kalihim Proceso Alcala sa Department of Agriculture, kini mipasabot nga nagkinahanglan gayud kining tanan og kooperasyon sa pribadong sektor aron masulbad sa hingpit kining maong suliran nga gihambin sa mga negosyante og karne.

Gipasalig ni Alcala nga sukad karon   magdestino na siya og taga NMIS sa buhatan sa Bureau of Customs aron masanta kining kaso sa hot meat. (BANATNEWS)