2 sa 'suspek' sa ambush nakahinabi sa CCPO

CEBU, Philippines - Duha sa lima ka mga tawong gisuspetsahang posibleng may kalambigitan sa pagpusil patay kang Antonio “Tony” Santos ang gikahinabi na sa kapolisan.

Gibutyag sa hepe sa Homicide Section sa Cebu City Police Office nga si Sr. Inspector Jul Mohammad Jamiri nga usa sa duha ang mitumbok sa ikaduha nilang nakahinabi nga suspek nga maoy gunman sa maong ambush.

Gikatakda pa hinuon nilang susihon og maayo ang maong impormasyon nga gikunsiderar lang nilang circumstantial evidence base sa mga pamahayag sa usa sa mga gisuspetsahan.

Matud pa kang Jamiri nga ang giingong posibleng gunman bag-ong salta sa dakbayan ug gikan sa Mindanao. Ang kapolisan nagsubay pa sa laing duha ka mga suspek ug ang ikalima maoy gidudahang mastermind sa maong pagpatay.

Sumala pang Jamiri ang lima ‘affiliated’ sa usa’g-usa o pulos managkaila nga may koneksyon sa biktima.

Dugang pa ni Jamiri migawas usab sa nagpadayong imbestigasyon nga mas daghang ebidensya ug mga impormasyon silang nakuha mahitungod sa posibilidad nga kahilambigitan sa biktima sa ilegal numbers games nungka sa ilegal nga drugas.

Usa sa gidudahan sa kapolisan nga posibleng may kalambigitan sa maong ambush ang robbery suspect nga si Ariel Degamo alas Doroteo Imperial nga gibalhog karon sa Cebu City Jail.

Si Degamo maoy uwahing gikaestorya ni Santos dihang mibisita ang nauwahi kang Degamo diha sa CCJ pipila ka minutos una pa patya si Santos paggawas sa CCJ diha sa barangay Kalunasan. (BANATNEWS)