Dugang kaso sa rob leader gipasaka

CEBU, Philippines - Human nakita nga adunay igong basehan ang pagsang-at og kaso batok ni Junjun Cabando alyas Dionisio Cabatingan Cabando “Jocjoc” ang City Prosecutor mirekomendar nga ipasaka ang kasong Robbery with Physical Injury ngadto sa korte.

Si City Prosecutor Mario Ley Gidayawan mirekomendar og P200 mil nga piyansa bugti sa temporaryong kagawasan ni Cabando. Sa nasayran nga niadtong Septiyembre 5 sa miaging tuig si Lewin Kaye Surig sa China Bank-Cebu Main Branch kauban duha ka gwardiya nga sila Lito Odag ug Loofer Efac nangolekta unta sa Robinson’s Mall niadtong milabay’ng tuig.

Apan sila gitulis ug nadala sa mga tulisan ang bag nga may sulod nga P1.2 milyones ug napatay ang duha ka gwardiyang sila si Odag ug Efac ingon man ang tulo ka mga kauban ni Cabando.

Sa diha nga gipakita si Surig og hulagway sa lalaki iya kini nga gikompirmar nga si Cabando maoy mition og armas ug mikuha sa bag nga iyang gibitbit. Duna pay laing kasong robbery with homicide nga gipasaka batok kang Cabando. (BANATNEWS)