CEBU, Philippines - “Sorry, pero in truth wala akong masamang ginagawa,” kini maoy mensahe ni kanhi Aklan City Mayor Alfredo Arcenio ngadto kang Gov. Gwendolyn Garcia bahin sa plano sa naulahi nga ipabalhin kini og laing bilanggoan gawas sa Cebu Provincial Detention and Rehabilitation Center (CPDRC).
Matud pa ni Arcenio nga nahinabi sa mga tigbalita kagahapong adlawa atol sa iyang hearing diha sa RTC branch 16 ubos sa sala ni Judge Sylvia Aguirre nga wala gyud siya’y nahimong kalapasan sulod sa karsel.
Dugang pa niini nga walay nahitabong special treatment kaniya sulod sa karsel gani iyang napanglantawan nga adunay problema tali sa jailwarden ug sa gwardiya hinungdan nga migawas ang taho nga adunay special treatment kaniya.
Gihulagway usab ni Arcenio nga usa siya ka estranghero sa Sugbo gani, wala usab siya’y kaila nga politiko hinungdan nga walay special treatment nga nahitabo.
“ I am a stranger of this place, wala akong kakilala na politiko dito sa Cebu,” pasabot pa ni Arcenio.
Mapasalamaton usab siya ni Garcia nga nindot ang pagkatagad niini sa CPDRC ilabi na ang mga facilities ug programang gihatag ngadto sa mga binilanggo ug gihulagway niyang ‘safe and secure’ ang CPDRC ug mas ganahan siya nga mabilanggo sa maong pasilidad. Dugang pa ni Arcenio nga dili niya mabasol si Garcia kun mohimo kini og aksyon sa nasayran niini batok kaniya kini tungod kay nasayod usab siya kun unsay responsibilidad sa usa ka public servant.
Butyag usab ni Arcenio nga kun siya usab sa lugar ni Garcia iya usab nga buhaton ang unsay angayang buhaton.
Samtang ang abogado ni Arcenio nga si Atty. Eduardo Arriba, mibutyag usab nga wala gyuy nahitabong special treatment sa iyang kliyente.
Mipadayag usab si Arcenio nga wala siyay kaligutgot nga gibati sa mga media sa Sugbo bisan paman og gipabuhagay ang iyang mga kalihukan nga bati bisan ug anaa pa siya sa karsel.
“ I don’t hate the media, hindi ako dismayado sa media,” matud pa ni Arcenio.
Si Arcenio suspek sa pagpatay kang Bombo Radyo manager Boy Henolan sa Aklan niadtong 2008. (BANATNEWS)