CEBU, Philippines - Mga pangalan nga giingong nakadawat o nakabenepisyo sa usa sa mga programa ni Kong. Benhur Salimbangon kadaghanan dili mga taga dakbayan sa Bogo sumala pa sa tubag ni Bogo City Mayor Celestino Martinez ngadto sa tubag niini sa suwat sa Commission on Audit.
Ang COA niadtong Oktobre mipadala og suwat kang Martinez ug nangumusta kabahin sa giingong livelihood program nga gigamitan sa Priority Development Assistance Fund (PDAF) ni Salimbangon.
Apan sa gihimong pagsusi sa mga sakop sa Bogo City Anticrime volunteers sa mayor sa mga gatosang mga pangalan sa kopyang gihatag sa COA nasuta nga duha lang kanila ang taga Bogo.
Ang duha wala usab makadawat og susamang livelihood program sa kongresista. Ang maong programa nga adto napunta sa Aaron Foundation nga nagbase sa National Capital Region nagkantidad og dul-an P8 milyones.
Nasuta usab nga ang maong foundation nalambigit sa kontrobersyal nga fertilizer scam kaniadto ug dili usab makontak ang linya sa telepono niini sumala pa sa usa sa mga staff ni Martinez .
Ang Banat News mitawag sa telepono ni Salimbangon sukad pa niadtong Martes aron pagkuha og pamahayag apan walay motubag sa telepono niini.
Apan sa laing susamang report sa usa ka lokal nga pamantalaan si Salimbangon mihimakak og kalabotan sa aktwal nga operasyon sa maong foundation sanglit ang government line agencies maoy mipili niini nga mosalo sa programa nga ang pundo adto kuhaa sa iyang PDAF.
Mibahad usab siyang manubag gyud kung duna may iregularidad o kahiwian sa paggamit sa maong pundo.
“Listed beneficiaries are fictitious and I vehemently deny any participation in the selection of the same,” pasabot pa ni Martinez sa iyang tubag ngadto sa COA.
“When being interviewed by the undersigned both personalities denied owning their signed signatures and manifested that they never knew that their names were included in the list of recipient of the Aaron Foundation Philippines Inc.,” matud pa ni Martinez. (BANAT NEWS)