CEBU, Philippines - Gisugdan na kagahapon sa buntag ang pagpanglarot ang mga lamppost gikan sa mga sidewalk sa Siyudad sa Sugbo nga gipanarok atol sa 12th Association of South East Asian (Asean) summit niadtong tuig 2007.
Ang nanglarot niini mao ang 15 ka mga kawani sa City Traffic Operations Management (CITOM) nga gidestino kagahapon didto sa Salinas Drive diin nagbarog ang 110 ka poste sa daplin sa dalan sa maong lugar.
Ang maong pagpanglarot gitagalan nga mahuman sulod sa lima ka adlaw.
Inigkahuman og larot sa mga lamppost sa maong lugar, mobalhin na usab ang maong team sa taga Citom aron sa pagpangibot na usab sa 685 ka mga lamppost nga gipananom sa kadaplinan sa karsada sa Osmeña Boulevard, Juan Luna Avenue, Veterans Drive ug uban pa.
Si Mayor Michael Rama nangunay sa pag- inspection kagahapon sa mga nalarot na nga mga lamppost.
Molanat og unom ngadto sa napulo ka minuto ang pagtangtang sa matag poste sumala pa sa taga Citom.
Aron nga motahom ang lugar nga gitarokan sa maong mga poste, pulihan dayon kini pagbutang og tanom nga ati manon sa City Agriculture Department aron magpabilin ang katahom sa mga kadalanan ning Siyudad.
Ang pagpanglarot sa maong mga poste nahimo subay sa kamandoan sa Ombudsman Manila kinsa misugo nga ang mga tinangtang nga mga poste dili mahimong gamiton sa bisan unsang paagi. (BANAT NEWS)