CEBU, Philippines - Gumikan sa nahitabo sa pito ka mga police trainees niadtong petsa 13 ning bulana didto sa Santa Catalina, Negros Oriental tungod sa grabeng kainit sa panahon ang Department of Health (DOH) makig-alayon kang PRO-7 Chief Supt. Marcelo Garbo aron di na kini masubli pa.
Si Angelita Salarda, pangulo sa Local Health Family Support Division sa DOH-7 nga nahinabi sa Banat News nagkanayon nga iyang awhagon ang kapulisan nga dili palabian og painit ang mga police trainees aron malikayan nga duna pay laing mabiktima sa heat stroke.
Matud ni Salarda nga kun mahutdan na gani og tubig sa lawas ang tawo ma-dehydrated ug mag-convulsion kini nga timailhan sa heat stroke.
Tambag ni Salarda nga kinahanglan nga moinom gyud og daghang tubig ug saktong pahulay ug dili magpasulabi sa kainit ang tambal niini.
Hinuon giklaro niya nga wala pay namatay sa heat stroke dinhi sa rehiyon siyete nga sukad nakasinati og grabeng kainit ang dakbayan sa nangaging pipila ka mga adlaw. (BANAT NEWS)