Ahente gitulis

CEBU, Philippines - Nasakiyo ang kwarta ug mga nagkalainlaing klase sa sim pack human gi-atangan ug gitulis ang kolektor ug ahente sa Globe Telecom sa barangay Lamak lungsod sa Pinamungajan niadtong Martes sa alas 3:30 sa hapon.

Ang nabiktima sa pagpanulis mao si Algier Salogana, 30, nagpuyo sa barangay Lut-od, Pinamungajan ug kolektor sa Globe Telecoms.

Duha ka mga lalaking gihulagway nga nagsakay sa kalabira nga motorsiklo nga way plate number ang gitumbok nga responsable sa pagpanulis.

Koleksyon nga P10 mil ug lainlaing sim packs ang nasakiyo apil na ang cellphone ug yawi sa motor niini nga service.

Matud ni SPO1 Uldarico Mangasca sa Pinamungajan Police Station dihang nahinabi sa Banat News naningil sa mga utangan ang biktima dihang kalit kining gipara sa duha ka tulisan nga nagparking daplin sa karsada.

Nakurat nalang siyang kalit siyang gitionan sa usa og armas dayong deklarar og tulis. Ang laing kauban ini maoy mikapkap ug mikuha sa mga nahisgutang butang.

Ang biktima naglakaw nalang nga midangop sa buhatan sa kapulisan kay wala na makapaandar sa iyang motor. (/EIM) (BANATNEWS)