Mga konsehal magpabilin sa ilang distrito

CEBU, Philippines - Gibutyag ni Konsehal Sisinio Andales nga magpabilin gihapon ang mga konsehal nga kaalyado ni Mayor Michael Rama sa pagdumala sa mga barangay nga gidestino kanila.

Ang district councilor maoy   gitahasan sa pagtan-aw ug pag-atiman sa pipila ka barangay nga gidestino nga mahimong hurisdiksyon sa matag konsehal sa siyudad.

Sila si Konsehal Edgardo Labella, Jose Daluz III, Konsehal Eduardo Rama ug Konsehal Ronald Cuenco mao ang mga konsehal nga kaalyado sa mayor.

Si Andales kinsa nahisakop sa mayoridad mipadayag nga wala siya maglisod bisan og duha ka dagkong komitiba ang iyang gihuptan karon human idugang kaniya ang committee on laws, ordinances, public accountability and good government nga unang gihuptan ni Labella.

Gawas niini siya usab ang gitahasan sa pagpanguna sa committee on labor and employment apan alang kaniya wala kini makapahinay sa dagan sa pangalagad sa konseho sa mga Sugboanon.

Samtang sa sayo pa daan nang gibutyag ni Labella nga dili makaapektar sa iyang trabaho isip konsehal an g ka- wala niya’y gikuptang komitiba karon. - Sanden J. Anadia/WC (BANATNEWS)