CEBU, Philippines - Gihangyo ni Governor Gwendolyn Garcia ang kagamhanan sa lungsod sa Badian nga moduso og resolusyon aron hangyoon si 2nd district congressman Pablo Garcia nga mangamahan og balaodnon aron mahimong protected area ang Kawasan Falls.
Kini subay sa gihimong temporaryong pagpasira sa maong tourist spot tungod sa kapakyas niini sa pagtuman sa balaod nga nagdili sa pagtukod og mga payag-payag sa palibot sa Kawasan Falls.
Kagahapon si Regional Director Rowena Montecillo sa Department Of Tourism (DOT)7 mipadala usab og regional advisory nga nagmando sa tanang mga opisyales sa tourism, mga operator ug ilabi na sa mga turista sa dili una pag-adto sa Kawasan falls tungod kay gipasirhan kini sa gobernador.
Si Garcia personal nga mi-inspection sa palibot sa Kawasan falls sa miaging adlaw ug dihang nasud-ong niya nga wala tumana sa mga taga didto ang iyang pasidaan sayo pa, siya mismo ang nangunay sa pagbunal og martilyo aron magusbat ang pipila ka mga payag-payag nga gitarok sa palibot sa nagbusagak nga tubig uban sa temporaryo nga pagpatak-op niini. - Lesley Caminade/WC (BANATNEWS)