CEBU, Philippines - Mas gipaboran sa usa sa mga pangulo sa kahugpongan sa mga bus operators sa Sugbu ang pagpahigayon og roadside random drug testings nungka sa compulsory drug testing sa mga drayber.
Ang compulsory drug test anha himuon atol sa pagkuha og lisensya ug pag-renew niini matag tulo ka tuig. Ang maong drug test anha buhaton sa mga accredited drug testing centers sa Land Transportation Office.
Si Julieto Flores, presidente sa Cebu South Minibus Operators Association nagkanayon nga mas pabor sila sa roadside drug test tungod kay dili makaikyas o makakita og paagi ang badlungong drayber aron magbinuang sa ilang sample nga ihi.
Matud pang Flores dunay mga badlungong drayber nga adik ang makalihay sa compulsory drug test pinaagi sa dili una paggamit og ginadiling drugas kung paingon siyang mo-renew sa iyang lisensiya.
Dugang pa ni Flores nga duna sila’y nadawat nga report nga dunay mga drayber nga tiggamitan og ilegal nga drugas nga mogamit og laing ihi ug mao kini ipaeksamin aron dili masakpan nga tiggamitan kini og ilegal nga drugas.
Apan pinaagi sa random drug test sama sa gihimo sa LTO-7 sa nanglabay’ng mga buwan dili makalusot ang mga drayber tungod kay kinalit-kalit man kini.
Niadtong milabay’ng Semana Santa, ang LTO-7 nakasakop og 21 ka mga drayber nga nagpositibo sa roadside random drug test sila pulos gikuhaan og lisensya ug mipadala sa ilang sample urine ngadto sa kaulohan alang sa confirmatory test.
Kun mamatud-ang positibo gyud sa ilegal nga drugas ang drayber i-revoke ang lisensya niini ug di kini subling makakuha niini kung walay mapakitang sertipiko nga nasulod kini sa drug rehabilitation center.
Ang ikaduhang paglukat niini og lisensya mas mahal kumparar sa normal nga proseso. (/EIM)(BANAT NEWS)