Bus operators supak sa fixed-salary sa ilang mga drivers

CEBU, Philippines - Gihulagway nga ‘defective ug unfair’ ang department order sa Department of Labor and Employment (DOLE) kalabot sa pagpatuman og regular wage sa mga drayber ug kundoktor sa mga buses.

Ang DOLE ug mga kadagkuan sa buses operator misuway pagtuki kagahapon sa planong paghatag og regular wage alang sa mga drayber ug kundoktor.

Ang DOLE mipasabot ngadto sa mga operators sa mga benepisyo sa mga drayber ug kundoktor diin naglakip kini sa SSS, PhilHealth, Pag-ibig, overtime pay, holiday pay, premium pay ug paternity pay.

Gihatagan og payment scheme ang mga operators ug gipasabot sila bahin niini.

Apan daw wala mahauyon ang mga operators sa nakab-ot nga department order sa DOLE kini tungod kay ilang napanglantawan nga defective ug unfair ang maong order.

Ang presidenti sa Cebu Provincial Bus Operators Association (CPBOA) nga si Richard Corominas nakapangutana ngadto sa kadagkuan sa Dole ug kun nganung wala malakip sa maong direktiba ang mga tourist buses nga parehas nila peligro gihapon sa disgrasya susama sa nahitabo sa mga Iranian nationals nga nagsakay sa tourist bus.

“ Your Department Order is defective and unfair, its just like favoring some sectors of the industry,” pasabot pa ni Corominas.

Samtang ang presidente sa minibus operators nga si Julie Flores nakaingon usab “Kun maghisgot tag incentives mura naman hinoon og kamo’y (gobiyerno) nagbuot sa among negosyo.”

Matud pa ni Flores nga susama na ang DOLE nga maoy nagkupot sa ilang negosyo tungod kay sila naman ang nagbuot sa payment scheme.

Si Ramon Boy Ewican sa Socorro Cruiser mipadayag nga ilang nakita nga susama sila og giduot ngadto sa kalisod tungod sa maong pamaagi sa DOLE nga unta matabangan usab sila dili lang ang drayber ug kundoktor.

 “ Nakasabot mi nga mitabang mo sa workers hinaot unta nga tabangan sab ninyo ang operators,” pasabot pa ni Ewican.

 Ang DOLE-7 Director Gloria Tango mibutyag sa mga tigbalita nga ilang gidawat ang mga komento sa mga operators nga ilang ipaabot sa ilang ulohang buhatan. (BANATNEWS)