Shabu nakuha sa CCJ

CEBU, Philippines - Kapin usa ka gatos ka mga paketeng may sulod nga gituohang shabu ang nasakmit sa mga jailguards atol sa gipahigayong ‘operation greyhound’ niadtong Sabado sa kaadlawon diha sa Cebu City Jail nga nahimutang diha sa barangay Kalunasan ning dakbayan.

Si CCJ Warden Supt. Johnson Calub nga nahinabi sa Banat News nagkanayon nga adunay nakahatag kaniya og tip nga may nakasulod nga shabu sa miaging visiting day.

Hinungdan nga iyahang gitawag ang atensyon sa iyang chief costudian aron i-schedule ang surpresang greyhound operation pagka-Sabado sa kaadlawon.

Ilang girombo ang cell number 5 sa main building sa maong bilanggoan nga sumala pa sa tipster diha giingong gidala ang illegal drugs nga shabu.

Human sa makuting pagsiksik sa maong selda nadiskubrehan nila ang 164 ka paketeng gituohang shabu ug napulo ka linikit nga marijuana.

Matud ni Calub walay miangkon sa 164 ka paketeng shabu apan dako ilang pagdudang ang bilanggong si Ruseller Diabelos, nga taga Duljo-Fatima kinsa nabilanggo niadtong tuig 2010 tungod gihapon sa kaso sa drugas maoy tag-iya niini.

Si SJO3 Arnel Jayme, Chief Security and Control sa CCJ nagkanayon nga hugtanong gihimakak ni Diabelos nga siya maoy tag-iya sa mga shabu.

“Mi-deny siya maoy tag-iya, during sa greyhound nakita sa among kauban (shabu ug kwarta). Gipangutana kinsay tag-iya sa kwarta nga anaa sa karton, niingon siya (Diabelos) ‘akoa na ang kwarta’. Gipangutana siya bahin sa shabu (ang tubag) ‘Ah dili na ako sir,” asoy pang Jayme nga nikutlo sa panghimakak ni Diabelos.

Matud ni Jayme ang shabu didto gibutang sa puting container nga plastic duol sa karton nga gisudlan sa kuwarta.

Apan si Calub bisan wala moangkon si Diabelos sa nakuhang shabu apan ila gihapon kining pasakaan og kasong kalapasan sa section 11 (possession) sa Republic Act 9165.

Nagduda si Calub nga bag-ong drug courier sa drugas ang nakapalusot niini niadtong katapusang visiting day sa miaging semana sanglit ilado na nila ang mga karaang tigpalusot ug tulo kanila nadakpan na.

 “Bisan ato na gi-advice dili magpasulod og shabu, usually private parts man gud ni ipasok ang shabu,” sumala pa ni Calub. Iyang giklaro nga base sa iyang nakuhang impormasyon walay nalambigit nga jailguards sa mga pagpalusot og shabu diha sa city jail. “So far wala pay involve nga personnel diri.”

Gibanabang mokabat sa P30 mil ang kantidad sa nasakmit nga shabu. Matud ni SJO4 Jayme nga bali’g lima ka gramos ang bana-bana sa gibug-aton sa maong mga shabu.(/EIM) (BANATNEWS)