Mokuha sa Civil Service Exam midaghan

CEBU, Philippines - Nagkadaghan ang mga aplikante sa Career Service Examination Paper and Pencil Test sa Civil Service Commission (CSC) karong tuiga kung itandi sa miaging tuig.

Kini ang gipadayag ni Salve Ilustrisimo, Administrative Officer V sa CSC atol sa pakighinabi sa Banat News kagahapon.

Matud pa ni Ilustrisimo nga sa Mayo 27, 2012 maoy gitakda nga petsa sa eksaminasyon ug kini dili na mahimong iuswag pa sa laing petsa.

Ang maong eksaminasyon dinhi sa Sugbo magsugod gayud sa alas 7:00 sa buntag didto sa University of the Visayas ug sa University of Cebu Main Campus .

Gipasidaan usab ni Ilustrisimo nga ang maulahi pag-abot dili na kahatagan og higayon nga makaapil sa eksamin. Nasayran  nga ang pagpanghatag sa application form sa maong eksamin nagsugod niadtong unang semana sa Pebrero, 2012 ug gitak-opan niadtong Abril 12, 2012.

Sa samang higayon, si Dexie Gonzales sa CSC 7    miingon nga walay gitakda nga matang sa biste nga isul-ob sa mga mokuha sa maong eksamin apan higpit nga gidili ang paggamit og sando, shorts, ug tsinilas.

Sumala niya nga ang mga aplikante mopresentar lang sa ilang application receipt, valid ID ug uban pang mga gikinahanglan nga dokumento atol didto sa dapit nga pahigayonan sa eksamin, sama sa Police clearance ug uban pa.

Hinuon si Gonzales miingon nga dili siya makahatag og estimate sa mokuha sa gidaghanon sa maong eksamin karong Mayo 27 kay mananghid pa siya sa iyang labaw.

Ang career service examination maoy nag-unang panginahanglan alang niadtong manarbaho sa hain mang buhatan sa gobiyerno.(/WC)   (BANATNEWS)