CEBU, Philippines - Gisugdan na og tuki nila ni Governor Gwendolyn Garcia, Board Member Sun Shimura ug Cebu City Administrator Jose Marie Poblete ang kahimtang sa Cebu North Bus Terminal (CNBT) ug ang planong kalamboan alang niini.
Kini pinaagi sa usa ka tigum nga gipatawag sa gobernador bahin sa isyu nga gisang-at 4th district provincial board member Shimura kinsa misugyot nga unta manginlabot na ang lalawigan sa pagdumala sa CNBT aron mahapsay kini sama sa Cebu South Bus Terminal (CSBT).
Atol sa maong tigum gihisgotan nila ang ligalidad sa maong terminal ug si kinsa gayud ang adunay dakong katungod sa pagpanag-iya niini.
Hinuon gipadayag ni Poblete nga kanunay’ng bukas ang dakbayan ubos sa liderato ni Mayor Michael Rama pagpakigduyog sa kagamhanan sa lalawigan sa Sugbo aron mapalambo ug mo-uswag usab ang CNBT.
Nagpasalamat usab si Poblete kang Gobernador Garcia sa laraw niini nga panindoton ang CNBT aron makatilaw usab og klarong serbisyo ang katawhan sa amihanang bahin sa Sugbu.
Human sa ilang unang panagtagbo sa miaging adlaw, gitakda sa gobernador nga mopatawag siya og laing miting sa sunod semana bahin sa maong isyu.
Ang maong panagtagbo gitambongan usab nila ni Provincial Legal Officer manlalaban Marino Martinquilla, Provincial Treasurer manlalaban Roy Salubre, Provincial Planning and Development Officer ug Provincial Engr. Adolfo Quiroga ug Paul Corominas, representate sa Cebu Bus Cooperative nga kasamtangang nagdumala sa CNBT. - (BANAT NEWS)