CEBU, Philippines - Mibisita sa Kapitolyo sa miaging Biyernes ang upat ka Sugbuanon nga migraduwar sa PMA Class Bagwis 2012.
Ang nakighimamat kang Governor Gwendolyn Garcia didto sa iyang buhatan mao sila si 2nd Lt. Jose Mari Cabrera, nga taga Sambag 2, dakbayan sa Sugbo kinsa maoy class salutatorian, Ensign Josh Gingoyon, taga dakbayan sa Mandaue, Ensign Melwin Goles, taga lungsod sa Minglanilla, ug si 2nd Lt. Teresita Ingente, taga Basak, San Nicolas, dakbayan sa Sugbo.
Sa ilang pamahayag atubangan sa gobernador, si Cabrera misaad nga moserbisyo siya sa Philippine Air Force aron matuman ang iyang damgo nga magpiloto, samtang sila si Gingoyon, Goles, ug Ingente, moserbisyo sa Philippine Army.
Si Gobernador Garcia nalipay kaayo ug mibati og dakung garbo sa talagsaon nga kalampusan nga na-angkon sa nahisgutang mga PMA graduates nga dako usab nga dungog sa mga Sugbuanon.
Gumikan niini gihatagan sa gobernador og pasidungog ang nahisgutang mga gradwado.
Ang gobernador naglaum nga modaghan pa ang mga Sugbuanong mosulod sa PMA.
Sila si Cabrera ug Ingente mi-awhag sa mga hapit na motapos sa sekondarya pag-apply sa PMA unya sa ipahigayon niining written examination sa Agusto ning tuiga.
Ang upat ka mga migraduwar sa PMA mo-report na sa ilang tagsa-tagsa ka napili nga buhatan sa armadong kusog sa Abril 18 human sa usa ka buwan nga bakasyon.
Human sa maong pagbisita sa bag-ong mga gradwado, misunod usab ang mga opisyal sa PMA nga gipangulohan ni Brig. Gen. Carlos Quita, ang PMA Commandant of Cadets uban ang upat sa 190 ka mga kadete sa PMA Class 2015 nga nag-field trip dinhi sa Sugbo sa pagpakighimamat sa gobernador. - (BANAT NEWS)