Tanod sikop sa buy-bust

CEBU, Philippines - Nagtingkagol ang usa ka tanod human kini nasikop sa kapolisan sa gipahigayong buy-bust operation niadtong Biyernes sa gabii diha sa barangay Dayhagon lungsod sa Medellin.

Ang nasikop mao si Eugenio Jumao-as Jr., 33, molupyo sa maong lugar human nakuhaan og duha ka paketeng gituohang shabu ug giingong kasamtangang tanod sa ilang barangay.

Sa pakighinabi sa Banat News ni SPO2 Roselito Ortega sa Medellin Police mibutyag kini ang ilang estayonan nakadawat og taho kalabot sa pagpamaligya ni Jumao-as og ilegal nga drugas hinungdan nga mihimo sila og buy-bust operation.

Tuod man, ang poseur buyer sa kapolisan nakignegosasyon ni Jumao-as nga mopalit kaniya og duha ka gagmay'ng pakete sa kantidad 500 pesos.

Sa diha nga gitunol na ni Jumao-as ang gituohang shabu ngadto na sa poseur buyer dali usab gilayon kini nga giposasan sa kapolisan ug gisikop.

Matud pa ni Ortega nga taod-taod na nilang gi-obserbahan ang pagpamaligya ni Jumao-as sa ilang barangay kini human usab nakadawat sila og taho kalabot niini.

Dugang pa ni Ortega nga notadong mamaligyaay og shabu si Jumao-as sa ilang dapit ug gani kapila na kini gibuyag sa ilang kapitan nga si Gonzalo Balonan, apan nagmagahi gihapon kini.

Butyag usab ni Ortega nga gitangtang na unta kini sa iyang pagkatanod tungod sa maong buhat apan gipabalik kini sa pagtuo nga nagbag-o na kini.

Kasong kalapasan sa Republic Act 9165 Sec. 5 kon pagpamaligya og ginadiling drogas ang atubangon sa suspetsado nga kasamtangang natanggong sa Medellin Police. - (BANAT NEWS)