200 kilong isda gisakmit

CEBU, Philippines - Mga pinabuthang isda ang nasakmit sa Task Force Kalikasan kagahapon sa udto diha sa sitio Mayima barangay Punta Engaño syudad sa Lapu-lapu.

Ang mga isda giingong gipanag-iya ni Nilo Talingting human kini niya gikompra kagahapong adlawa nga gikan sa Caubian Island.

Sa pakighinabi sa Banat News ni SPO1 Jomar Ybañez, team leader sa Task Force Kalikasan sa syudad sa Lapu-lapu misaysay kini nga nakadawat sila og taho gikan sa ilang team nga nagbase sa Caubian Island nga adunay nagpabuto og dinamita.

Hinungdan nga ila kini nga gisubay apan wala na kini nila maabti, tungod niini ila nalang nga gibagat ang gisakyan sa mga pinabuthang isda diha sa may Punta Engaño.

Tuod man, ang Task Force nakasikop ni Talingting dala ang 200 kilos nga yellow fin nga tuna nga nagkantidad og P52 mil, 25 kilos nga pagispis nga nagkantidad usab og P2,250 ug 20 kilos nga Danggit nga nagkantidad og P1,600.

Matud pa ni Ybañez nga kasong kalapasan sa Republic Act 8550 maoy ilang ipasaka batok kang Talingting nga kasamtangang natanggong sa ilang buhatan.

Butyag usab ni Ybañez nga ang mga isda nga ilang nasakmit ilang gipang-apod apod sa barangay Punta Engaño nga mga less fortunate samtang ang uban niini tua sa Department of Social Welfare and Development (DSWD) samtang ang uban usab tua sa BJMP. - (BANAT NEWS)