Talisay mohimo og traffic manual

CEBU, Philippines - Kagamhanan sa dakbayan sa Talisay migama og manual alang sa codification sa traffic code sa dakbayan nga kaparehas sa gipatumang traffic manual sa City Traffic Operations Management sa siyudad sa Sugbu.

Si Bise Mayor Alan Bucao, chairman sa City of Talisay-Traffic Operation Development Authority (CT-TODA) nga nahinabi sa Banat News nagkanayon nga ang maong traffic manual gibase sa CITOM nga ilang gitun-an niadtong Abril 13 ug 14.

Tuyo nila nga masinati sa mga enforcers ang maong traffic manual ug sa implementasyon niini.

Ang maong seminar gitambongan sa mga sakop sa CT -TODA, representante sa Land Transportation Franchising Regulatory Board (LTFRB) nga si Jonathan Tumulak, Talisay City Prosecutors nga sila si Marshall Rubia ug Hyacinth Jadraque nga maoy mga facilitators.

Gibutyag ni Bucao nga ang siyudad aduna nay ordinansa bahin sa trapiko apan ang CT-TODA maglisod og patuman niini tungod kay ang maong ordinansa dunay daghang mga buslot.

Ang maong forum gipaabot nga magbunga alang sa paghimo og kaugalingong traffic manual sa dakbayan sa Talisay nga ilang paaprubahan unya sa konseho aron mahimong ordinansa.

Sa wala pa magama ang maong traffic manual ang mga enforcers sa siyudad gi-seminar una ni Rubia ug Jadraque sa pamaagi sa ilang pagsikop sa mga drayber nga badlungon ug gi-edukar usab sila sa mga balaod kabahin sa trapiko.

Si Bucao midugang nga gibansay sa siyudad ang mga enforcer kabahin sa saktong mga pamaagi sa ilang trabaho aron dili na mausab ang nahitabong pagpusil patay sa usa ka traffic enforcer kaniadto. (BANATNEWS)