Dizon giisip nga daotan ang mando ni Rama

CEBU, Philippines - Giisip ni Konsehal Alvin Dizon nga usa ka pagtamay sa konseho ang mando ni Mayor Michael Rama nga mananghid kaniya ang mga opisyal sa city hall nga imbitaron sa konseho.

Matud pa ni Dizon nga murag gihikaw ni Rama sa konseho ang katungod nga makapangapkap og impormasyon gikan sa mga department head ug sa mga luyoluyo niini nga angayang masayran sa publiko.

Suma pa ni Dizon nga ang pagpatawag sa konseho sa mga department head gitumong alang sa kaayohan sa publiko ilabi na kung aduna sila’y tukion nga mga isyu.

Gusto si Dizon nga bakwion ni Rama ang maong kamandoan aron malikayan nga magkasinungayay ang mayor ug ang mga konsehal sa dakbayan.

Alang kang Dizon nga normal lang nga ipatawag sa konseho ang mga department head alang sa usa ka executive session ilabi na kun aduna sila’y gusto nga masayran ug maklaro nga mga isyu gikan sa maong mga opisyal.

Sa miaging mga semana sagunson nga gipatawag sa konseho ang mga nagkadaiyang department head ug ilang mga luyo-luyo gumikan sa nadawat nilang reklamo gikan sa maong mga opisyal bahin sa pagtibhang sa budget sa ilang tagsa-tagsa ka departamento. (BANATNEWS)