CEBU, Philippines - Gipasalig ni Police Director General Nicanor Bartolome nga ilang buhaton ang tanan masikop lang si Philippine Benevolent Missionaries Association Supreme Master Ruben Ecleo Jr. kinsa bag-ohay lang gikombikto sa kasong parricide sa korte dinhi sa Sugbu. Matud pa ni Bartolome nga nahinabi sa The Freeman atol sa gihimong medical mission sa syudad sa Mandaue kagahapon mipasalig kini nga ilang buhaton ang tanan mabalik lang sa bilanggoan si Ecleo.
Miangkon si Bartolome nga dili sayon dakpon si Ecleo tungod sa impluwensya niini apan gipaniguro niya nga walay kalainan si Ecleo sa ubang mga nakombikto.
Gipaniguro ni Bartolome nga ila gayud nga masikop si Ecleo. "Ito’y (Ecleo's case) matagal nang dinidinig, at siyempre, kung ano iyong resulta ay nirerespeto natin. Ang mandato natin bilang law enforcers ay magpapatuloy. There are instance there will be some difficulty sa paghahanap. Meron tayong mandato at iyon ang gagawin nang mga pulis,” pasabot pa ni Bartolome
Kahinumduman nga sa miaging adlaw gihukman ni Regional Trial Court (RTC) Branch 10 Judge Soliver Peras nga sad-an si Ecleo sa pagpatay sa iyang asawa nga si Alona Bacolod diin gisentensyahan kini nga mabilanggo sulod sa 40 ngadto sa 60 ka tuig ug gipabayad og danyos nga dul-an P26 milyones.
Samtang si Private prosecutor Kit Enriquez miawhag sa House of Representative nga tangtangon na si Ecleo sa ilang talaan tungod kay di na kini makarepresentar pa sa iyang konstituwente.
“He should be replaced...how he could be replaced if the congress will not act on their letters...Why not expel him from the congress, why wait for a formal complaint when in fact he was already convicted...is it okay to sit beside a criminal?” pasabot pa ni Enriquez.
Gikwestyon usab niya nganong hangtud karon wala pa madakpi si Ecleo bisan aduna na kini warrant of arrest sa Sandiganbayan ug karon nakombikto pa sa kasong parricide dinhi sa Sugbu.Giawhag ni Enriquez ang interior government pagbutang og ganti alang sa pagkasikop nii Ecleo.
Samtang gipahibalo usab ni Enriquez nga dunay nakahatag kaniya og impormasyong miaktibo na ang gitawag nga “White Eagle” squad ni Ecleo human sa pagkakombikto sa naulahi sa maong kaso. (BANATNEWS)