CEBU, Philippines - Naglunang sa kaugalingong dugo ang usa ka construction worker samtang samaran usab ang laing duha niini ka mga kauban human sila giunay og kulata sa ilang kauban pasado alas-12 sa tungang gabii diha sa sitio Rosevelt barangay Busay ning dakbayan.
Ang namatay nailhan lang sa ngalan nga Joshua samtang ang samaran mao silang Ranilo Soquib, 37 ug Jacenito Borres kinsa giingong gikulata ug gibunalbunalan og tubo sa mga kaubang sila si Benjie Sinaloba, Vicente "Insik" Bentiligan ug Jopel Masuko nga pulos taga Carmelo lungsod sa Tabuelan.
Base sa alegasyon ni Soquib, nangatulog silang tulo diha sa 3rd floor nga bahin sa ilang gitukod nga edipisyo dihang mao nalay ilang namat-an ang kasakit nga ilang nabati sa kalawasan.
Sa ilang pagmata mao nalang ilang nakit-an nga gitabangan sila og bukbok ug kulata sa mga suspek hinungdan nga mialibwag sila og bangon aron manukol apan daling nanagan ang tulo dihang natumba si Joshua.
Si Soquib walay nahimo kondili ang tabangon ang duha ka kauban nga sila si Joshua ug Borres apan nakugang siya nga nagkadugo og maayo si Joshua hinungdan nga misiyagit siya og panabang.
Ang gwardiya sa ground floor nga si Josefino Cordisan, daling miadto sa nahimutangan sa biktima ug dali usab nga nangayo og pakitabang sa kapolisan ug gidala ang tulo sa Cebu City Medical center (CCMC) apan gideklarar nga patay na si Joshua.
Ang mga tanod sa barangay Busay nakarekober sa motorsiklo nga gisakyan sa suspetsado nga gipanag-iya ni Borres diha sa ubos sa pangpang nga gituohang gituyo og tambog. Dako ang pagduda sa kapolisan nga personal nga panag-away ang motibo sa maong krimen.(/EIM) (BANATNEWS)