Vintage bomb nakawtan sa maid

CEBU, Philippines - Gibati og kahadlok kagahapon sa hapon ang mga residente sa barangay Cansojong, dakbayan sa Talisay gumikan sa usa ka vintage bomb nga nakawtan sa usa ka katabang nga dalagita sa panimalay ni Dr. Macaraig Canton sa maong barangay.

Si Fe Gonzales sa Fisherman Sea and Ecological Care (FISECA) nga nahinabi sa mga tigbalita mibutyag nga ang katabang ni Canton kinsa nagpangidaron og 15 anyos nagkawot og mabaw nga lungag sa kilid sa balay sa iyang amo aron unta himoong labayanan sa mga sagbot.

Apan nahibulong ang maong katabang dihang naigo sa iyang bara ang usa ka tayaon nga puthaw hinungdan nga iya   kining gibunalan og martilyo apan nahunong siya dihang gibadlong siya sa kauban ra usab  niyang katabang.

Didto naukay ang pamilyang Canton busa nanawag sila sa buhatan sa FISECA kinsa misusi dayon sa maong butang ug nakurat nalang sila dihang ilang nasuta nga usa diay kini ka vintage bomb.

Gihulagway ni Gonzales nga ang maong bomba nga adunay gitas-on nga duha ka tiil ila dayon kining gitugyan ngadto sa kapolisan.

Ang nabalak-an nila ni Gonzales ug sa mga silingan sa pamilyang Canton kun natam-okan pa og mga sagbot ang maong bomba, unya gidusliban ug kayo ug mibuto, “aw impas ang tanan.”

Gisaysay ni Gonzales nga ang iyang amahan kaniadto sundalo sa ikaduhang gubat sa kalibotan ug misugilon kini nga ang mga abyong iggugubat sa Amerikano nanghagbong og mga bomba sa barangay Cansojong paingon ngadto sa barangay Dumlog.

Ang uban sa maong mga bomba wala makabuto apan bisan sa kadugay nang mga katuigan nga kini napundo mobuto gihapon kini kun mauyog ang iyang kemikal bisan kun tayaon na kini .  (BANATNEWS)