STC mibahad mokiha'g child abuse sa ginikanan

CEBU, Philippines - Giplano karun sa kampo sa Saint Theresa’s College nga mosumbalik og kiha og kasong child abuse batok sa mga ginikanan sa mga menor de edad nga mireklamong wala makapaso sa ilang gradutaion.

Ang legal counsel sa tunghaan nga si Atty. Joan Largo mibutyag nga ang pagsang-at og kasong child abuse batok sa mga ginikanan usa kini sa ilang mga options nga giplanohang buhaton.

Mipasabot si Largo nga responsibilidad sa mga ginikanan ang pag-monitor ug pagpahimangno sa ilang mga anak ilabi na kay pulos sila mga menor de edad.

“If there's anyone liable it is the parents for their failure to supervise their children,” pasabot pa ni Largo.

Butyag pa ni Largo nga ang iyang basehan sa pagpasaka og kasong child abuse batok sa ginikanan mao ang pagpasagad sa mga ginikanan sa ilang mga anak nga malambigit sa mga law-ay nga buhat nga na-post ang pipila ka hulagway diha sa Facebook.

Sumala pa ni Largo nga anaa sa Republic Act 7610 nga ang mga ginikanan maoy kinahanglang manalipod sa ilang mga anak gikan sa mga kadaot susama sa mga bisyo ug uban pa. “RA 7610 states that parents to let their children to stay away and supervise from vices, smoking and drinking,” saysay pa ni Largo.

"Supervice them in such a way that they will not be lead to a dissolute life" matud pa ni Largo.

Kahinumduman nga niadtong buwan sa Marso naukay ang katawhan sa diha nga adunay lima ka tinun-an sa high school sa STC ang wala tuguti nga makapaso tungod sa giingong hulagway nga na-post sa facebook nga giisip sa maong tunghaan nga kalapasan sa ilang student ug school manual. (BANATNEWS)