CEBU, Philippines - Gipasakaan og kasong homicide ang usa ka tawo nga nakaingon sa kamatayon sa 59 anyos nga namana sa tinguha unta niyang paghikog didto sa 1st Mactan Bridge sa sitio Seaside, barangay Pajo, dakbayan sa Lapulapu sa miaging Miyerkules sa gabii.
Ang gipasakaan og kaso mao si Aniano Berdin, 30 , nga taga Babag II sa maong dakbayan kinsa giingong nawad-an sa maayong pangisip ug misulay unta sa paghikog pinaagi sa paglayat sa maong taytayan.
Matud pa ni Inspector Zenaido Pastorfide sa homicide section sa kapolisan sa maong dakbayan nga si Maria Teresita Sison ang asawa ni Danilo Sison, 59, maoy kihante.
Si Sison mao pay pagtunga gikan sa ilawom sa dagat nga namana apan mipusnga kini ug mibalik og unlod sa ilawom sa dagat dihang mitugpa kaniya si Berdin nga milayat gikan sa tulay.
Si PO2 Luisito Ernie miingon nga nagduhaduha unta sa pagpasaka og kaso ang mga sakop sa pamilya sa namatay dihang nasayran nga nag-antos sa sakit nga nerbyos ang suspetsado.
Nadala pa sa tambalanan si Sison human kini makuyapi apan nabugtoan ra sa kinabuhi didto sa hospital. (BANATNEWS)