CEBU, Philippines - Patay ang usa ka tawo nga gitabangan og pusil sa duha ka wala hiilhing lalaki nga nagtaptap sa ilang nawong ala-1 pasado ang takna sa hapon niadtong milabay’ng Miyerkules sa sitio Atis, barangay Canjulao, dakbayan sa Lapulapu.
Ang biktima mao si Carlo Romeo, 30, nagpuyo sa sitio Manga sa nahisgotang barangay sa maong dakbayan.
Si PO2 Luisito Ernie sa kapolisan sa Presinto 3 sa Lapulapu City Police Station (LLCPO) nga nagbase sa barangay Poblacion sa maong dakbayan nga nahinabi sa Banat News miingon nga naglingkod sa usa ka tindahan ang biktima dihang giduol sa duha ka wala hiilhing lalaki nga nagtaptap og panapton sa ilang nawong ug mipusil sa biktima.
Matud pa ni Ernie nga wala unta makaboto ang armas sa unang pagpusil sa biktima nga maoy hinungdan nga nakahigayon kini sa pagdagan apan gigukod ang biktima sa mga gikatahapan ug gipaulanan og bala.
Ang mga mamumuno daling mibiya luwan sa usa ka motorsiklo samtang gibiyaan ang biktima nga nakaangkon og pinusilan sa bukobuko, ulo ug uban pang bahin sa kalawasan.
Matud pa ni PO2 Ernie nga ang sakop sa pamilya dili pa makasulti ngadto kanila kun aduna bay gikaaway ang biktima nga maoy usa sa ilang gikatahapan nagpusil patay niini.
Gisusi usab sa kapolisan ang anggulo kabahin sa illegal nga drugas sa maong krimen. (BANATNEWS)