Private schools sirad-an kun...
CEBU, Philippines - Mahimong pasirad-an sa Department of Education DepEd ang mga pribadong tunghaan kun mahibaw-ang wala nila tumana ang ilang mga rason sa ilang pagpangayo og usbaw sa tuition fees sa subling pagbukas sa klase karung Hunyo.
Matud ni DepEd -7 acting regional director Carmelita Dolangon nga sagad sa mga rason sa mga pribadong tunghaan sa kindergarten, elementarya ug sekondarya nga mi-apply sa ilang buhatan nga makapatuman og umento sa tuition fees mao ang pagpalambo sa ilang pasilidad, dugang sweldo sa mga maestra ug ang pagpalit og kagamitan sa tunghaan.
Sagad sa pribadong tunghaan nga mi-apply aron makapatuman og umento sa tuition fees dinhi sa Central Visayas naggikan dinhi sa Sugbo.
Apan giklaro ni director Dolangon atol sa interbyu sa DyDD gikinahanglan nga dunay ginikanang mosang-at og pormal nga reklamo kun makita nilang wala molambo ang tunghaan bisan pa sa pag-umento sa tuition fees.
Matud pang Dolangon dali silang mohimo og imbestigasyon batok niini ug kung masutang tinuod ang reklamo mahimo nilang pasirad-an ang maong tunghaan.
Ang laing remedyo niini matod ni Dolangon mahimong manduan nila ang hingtungdang tunghaan pagpauli ngadto sa tinun-an sa gikolektang umento sa tuition fee sa maong tunghaan. (BANATNEWS)
- Latest
- Trending
