Rama 'dawat limpyo' sa SRP-Young
CEBU, Philippines - Gihulagway ni Bise Mayor Joy Augustus Young nga “dawat limpiyo” ang plano ni Mayor Michael Rama nga mogahin og puwesto sa South Road Properties aron idonar sa Bureau of Customs.
Una na nga gihingusgan ni Rama ang pagbabag sa laraw ni Customs Commissioner Rozzano Rufino Biazon nga bawion ang building sa maong ahensya nga gihimo og Malacañang sa Sugbo.
Ang mayor mipadayag nga imbes bawion, mas maayo nga adto na lang sila magtukod sa ilang buhatan sa SRP.
Si Rama naglaraw nga gusto ipreserbar ang Malacañang sa Sugbo gumikan sa heritage value niini.
Apan si Young sa iyang bahin, kinahanglan nga mag-agi sa konseho ang tanang transaksyon nga himoon sa SRP sanglit property man kini sa siyudad.
“Sayon-sayonon ra niya (Rama) paghatag ang mga yuta sa SRP kay dili man siya ang gahago ana,” matud pa sa bise mayor.
Dugang pa ni Young nga kung dunay gusto mogamit sa SRP kinahanglan ang taas nga panahon sa pagtoon niini.
Matud pa sa bise mayor nga ang SRP gitukod alang sa sunod nga mga henerasyon. (BANATNEWS)
- Latest
- Trending
