Dalaga gipaangkan og duwende

CEBU, Philippines - Usa ka 20-anyos nga dalaga ang giingong gipaangkan sa usa ka duwende diha sa usa ka barangay sa dakbayan sa Toledo.

Ang maong babaye giingong mihimugso sa usa ka duwende niadtong Martes sa udto, hinuon ang bata himsog kaayo, apan mitimbang lang kini og duha ka kilo.

Kini maoy ikaduhang higayon nga dunay kahibulongan sa pagpanganak sa 20-anyos nga inahan, kay niadtong tuig 2010 sa nag-edad pa kini og 18-anyos nanganak usab kini og isdang ‘molmol’ ug ang tiil daw sama sa ‘baki’ apan namatay human gihimugso ang bata.

Gihulagway sa mga silingan ang inahan nga usa ka buotang pagkabata, wala nila kini makit-ing maglaag-laag apan dunay panahon nga molakaw kini sa merkado sa Toledo kuyog ang iyang maguwang ug amahan.

Si Merla, 22, gipugngan ang tinuod pangan sa Banat News miasoy sa Banat News nga dunay uyab ang iyang manghod kaniadto. Mao usab kini ang tigbantay sa ilang humayan.

“Ikaduha na ni nga bata, katong una kay morag isda nga ‘molmol’ walay kanal, gilubong sa bundo,” sumala pa ni Merla.

Dugang ni Merla ang estorya sa mananabang nga naibgan ang iyang manghod og ‘dili ingon nato’ o engkanto ug manganak kuno kada tuig.

Nahibulong si Merla nga onse ka buwan nga wala reglaha ang iyang manghod ug normal ra usab ang gidak-on sa tiyan niini nga wala modako ug nagtuo silang ‘tumor’ ang sakit sa iyang manghod.

Sa unang pagpanganak sa iyang manghod miabot usab og dose ka buwan nga wala reglaha.

Gani iya pang gitambagan ang iyang manghod nga magpahiling nalang og doctor apan mibalibad kini kay basin og maghatag lang siya og problema sa ilang amahan.

Matud ni Merla niadtong Martes nagmulo sa kasakit sa tiyan ang iyang manghod hinungdan nga ilahang gipainom og ‘paet’ nga dahon ug gidut-an sa bukton sa amahan ang tiyan sa iyang manghod.

Apan nakurat siya ug iyang amahan dihang kalit lang kining mihimugso og bata.

“Si papa gud niatras paingon didto kay imbes ang bata mouha man na ini’g gawas? Kani siya kay lain dako kaayo og tingog nga murag baki,” saysay pang Merla.

Ang ilang balay karaan ug ginama lamang sa kahoy apan dunay dagko ug karaang punoan sa mangga, daghang ‘bundo’ nga yuta, mga nipa luyo sa ilang balay. “Mopakita usahay, gamay ra, wala naman padunggon ra ko sa iyang tingog. Mokatawa na siya kita sa bata, dili nako masabtan iyang gisulti,” asoy pa sa inahan nga si Gina, 20, tinuod pangan gipugngan sa Banat News.

“Natug ko sa bundo pagmata nako kapoy akong lawas, bugnaw akong panit, dili ko kamatngon kun hilabtan ko niya,” dugang asoy pa niini.

Atol sa iyang pagpanganak walay tubig nga migawas sa iyang sabakan. “Wala ko gibati, wala sad ko nangala,” matud pa sa dalaga.

Matud ni Gina nga alas-12 sa tungang gabii magpakita kaniya ang gagmay nga tawo gawas sa ilang balay.

Si Sherly Longakit, 63, silingan nga nahinabi sa Banat News kagahapon mitug-an nga sa sinugdanan wala gyud siya motuo nga adunay dili ingon nato o dewende apan karun motuo na siya human nanganak si Gina.

Sumala pa niini kaniadto pa siya sige makadungog nga dunay nakit-ang mga gagmay’ng tawo sa balay sa maong dalaga. (BANATNEWS)