Binatoay miulbo sa yuta ni Sesbreño

CEBU, Philippines - Miulbo ang kagubot kagahapon sa buntag sa yuta nga gipanag-iya sa pamilyang Sesbreño sa barangay Lawaan, dakbayan sa Talisay pinaagi sa binatoay dihang gipadayon ang pagginubaay sa kabalayan sa maong lugar.

Nagsugod ang pagpanglupad sa mga bato ug botelya dihang ang demolition team nga gipangunahan ni sheriff Constancion Alimurong mibungkag sa junk shop ni Efren Oros sa barangay Lawaan III.

Ang mga botelya ug mga bato giingong gikan sa compound ni Oros ug gani may usa ka PUJ ang naigo niini ug nalumping ang kilid sa maong sakyanan.

Hinuon walay bisan usa nga sakop sa demolition team nga naigo.

Ang sakop sa Special Reaction Unit ug kapolisan sa Talisay maoy mibadlong sa mga namato.

Si Superintendent Eddie Recamara, hepe sa kapolisan sa Talisay maoy nakigsabotsabot kang Oros ug sa mga kauban niini   sa pagpakgang sa kasamok.

Si Oros sakop sa Kinatas-ang Kahugpungan sa Kapupud-an Datus Alimaong (KKKDA) kinsa mipasangil kang SFO1 Ramiro Sesbreño nga pag-umangkon sa abogadong Sesbreño nga namusil kaniya apan wala kabuto.

Ang writ of demolition alang kang Oros giluwatan kini ni Regional Trial Court (RTC) Judge Gilbert Moises sa Branch 18.  - BANAT NEWS