Patay'ng lawas milutaw sa mahiga

CEBU, Philippines - Patay’ng lawas sa usa ka batan-ong basurero milutaw sa Mahiga Creek duol sa J. Luna Extention sa barangay Mabolo niadtong Martes sa alas-6 sa gabii.

Ang maong lalaki nga wala pa mailhi adunay mga tattoo sa lawas nga ‘Bulaw’ ug ‘Rambo’ ug gibanabanang 20-anyos pataas nga nailang taga Davao City ug mamunitay og basura.

Sa impormasyong nakuha sa Homicide Section sa Cebu City Police Office (CCPO) pinaagi nilang SPO1 Victor Ruel Ayuman, PO3 Lou Pagara ug PO2 Erwin Piquero, usa ka 13-anyos ug usa ka Ronald Coyuca nga pulos basurero maoy nakakita sa patay’ng lawas nga naglutaw sa tubig uban sa mga basura.

Dali nilang gipahibalo sa Mabolo Police Station ang nakita. Sumala pa sa Crime Scene Investigation Unit (CSIU) niburot na ang lawas sa maong lalaki ug gituohang duha ngadto sa tulo ka adlaw na kini diha sa tubig.

Gikatakdang ipaawtopsiya ang patay’ng lawas pagtino kun wala bay foul play sa kamatayon niini.  - BANAT NEWS