Public hearing sa p9 nga pletihan

CEBU, Philippines - Ipahigayon karung adlawa sa Land Transportation Franchising and Regulatory Board (LTFRB)-7 ang public hearing alang sa petisyon sa transport groups pagpangayo og P1.50 nga umento sa pletihan sa pampublikong sakyanan aron mahimo nang P9 ang bag-ong minimum nga pletihan.

Matud ni LTFRB-7 director Ahmed Cuizon sa Banat Manobela sugdan ang maong public hearing sa mga alas 2:00 karong hapon hangtud sa alas 4:00 diha sa Cebu Normal University (CNU) sa dalan Osmeña Boulevard.

Nunot niini gidapit ni Cuizon ang publiko nga maoy numero unong apektado sa pagtambong apil na ang uban pang sektor.

Ang resulta sa maong public hearing maoy basehan sa LTFRB alang sa pagduso og rekomendasyon ngadto sa ilang ulohang buhatan kun aprobahan ba o dili ang laing umento sa pletihan.

Ang Bayan Muna Central Visayas pinaagi ni Armand Perez ingon man ang Consumers Rights for Economic Welfare (CREW) pinaagi ni Vic Sapio miduso na sa ilang suwat nga hugtanong nagsupak sa gipangayong laing umento sa pletihan.

Apan matod ni Cuizon gikinahanglan gihapon nga motambong ang maong duha ka pundok sa maong public hearing karong hapon aron makapagawas sa ilang sentimiyento may labot sa petisyon sa mga drayber.

Ang City Integrated Transport System Cooperative (CITRASCO) maoy niduso og petisyon nga nangayo og dugang P1.50 sa pletihan tungod sa pagmahal sa presyo sa petrolyo.

Niadtong miaging buwan gipatuman sa LTFRB ang P.50 centavos nga provisional increase maong P8 na karon ang minimum nga pletihan samtang gipaabot pang husayon ang mga petisyon sa mga drayber.  - BANAT NEWS