Russian nat'l biktima sa laglag bariya

CEBU, Philippines - Usa ka Russian national nakuhaan og P150 mil sa mga sakop sa Laglag Bariya Gang sulod sa jeepney nga iyang gisakyan didto sa Parkmall dakbayan sa Mandaue sa milabay’ng gabii.

Ang biktima mao si Petronov Zaina Liboc, 27, dalaga, taga nasud sa Russia kinsa kasamtangang nagpuyo sa usa ka hotel sa dakbayan sa Lapulapu kay nag-eskuyla og English dinhi sa Sugbo.

Matud pa ni P/SInsp. Ramil Murfos sa kapolisan sa Mandaue nga mireklamo ang biktima sa ilang buhatan ug base sa sumbong niini, nasuta nila nga biktima kini sa Laglag Bariya Gang.

Ang biktima nagsakay og PUJ gikan sa dakbayan sa Lapulapu paingon sa dakbayan sa Mandaue .

Apan sulod sa sakyanan mitug-an ang biktima nga may   tawo nga midip-ig pag-ayo sa paglingkod tupad niya ug nanghagbong og mga sensiyo sa hawanan sa PUJ.

Mitug-an ang biktima nga sa iyang ka-inosente iyang gitabangan ang tawo sa pagpunit sa maong mga sinsiyo apan sa pag-abot niya sa Parkmall sa Mandaue Reclamation Area nawagtang na ang iyang pitaka.

Ang pitaka sa biktima may sulod nga kwartang US dollar, ug Russian dollar nga nagkantidad og P150 mil ang tanan ug mga mahinungdanong ID.

Gipangita sa kapolisan ang maong grupo nga mibiktima sa maong langyaw.  - BANAT NEWS