Gipatay sa lugar diin gipatay ang igsuon

CEBU, Philippines - Nasablay pa sa manobela sa iyang gimanehong traysikad ang usa ka lalaki nga gipusil sa duha ka armadong mga lalaki samtang kini namasahero sa miaging alas-9 sa gabii diha sa barangay Inayawan ning dakbayan sa Sugbu.

Si Sergius Rabadon, 53, nagpuyo sa sitio Dumalagan, Upper Inayawan sa naasoy’ng barangay nakaangkon og daghang samad pinusilan sa bukobuko ug agtang nga miresulta sa pagkamatay niini.

Sumala pa ni SPO1 Ruth Violango sa Homicide Section dihang nahinabi sa Banat News namasahero ang biktima ug posibleng giatangan sa mga mamumuno una pa gipusil.

Si Abegail Rabadon nga igsuong babaye sa biktima mitug-an sa kapulisan nga wala sila masayod kun duna bay kontra ang iyang igsuon apan kini mitug-an nga niadtong 2003 gipatay ang usa nila ka igsuon sa mao gihapong lugar.

Wala pa matino sa kapulisan kun may kalambigitan ba ang duha ka pagpamusil sa magsuon tungod kay padayon pa ang ilang imbestigasyon sa hitabo.  - BANAT NEWS