Duha ka sikyu nga nagbinunalay gipriso

CEBU, Philippines - Duha ka mga security guard nga nag-unay og binunalay gumikan sa kalasbag gisikop sa kapolisan sa ilang giguwardiyahang establisemento   sa Barangay Subangdako dakbayan sa Mandaue   sa miaging gabii.

Ang mikagulkol karon sa prisohan mao sila si Louie Villacarlos, 33, nga nagpuyo sa Barangay Guizo, dakbayan sa Mandaue ug Roel Batiancilla, hingkod nga nagpuyo sa Barangay Paknaan sa mao gihapong dakbayan, pulos mga security guard sa Invincible Almeda Security Agency nga kaubang nagbantay sa Sheridan Building sa Brgy. Subangdako.

Si SPO1 Herbert Pelayo sa kapolisan sa Presinto 2 sa Mandaue City Police Station mibutyag nga si Batiancilla nasuko kang Villacarlos gumikan sa pagpabuto niini sa iyang armas nga shotgun atol sa ilang panag-inom samtang nag-duty sila sa maong higayon.

Gumikan niini mikuha si Batiancilla og kahoy ug iyang gipusposan si Villacarlos busa nawingig ang biktima.

Ang mga residente sa maong dapit maoy miuwang kang Batiancilla ug Villacarlos nga naglinayugay ug nabawi nila ang shotgun ni   Villacarlos.

Samtang si Batiancilla nakuhaan usab sa iyang service firearm nga kalibre 38.

Dihang nahiabot ang kapolisan, gipang-embargo ang maong mga armas sa duha ka lasbag nga guwardiya.

Aron dili magkamatay gibuwag og tanggong   ang duha, diin si Batiancilla didto ibalhug sa Station 4, samtang si Villacarlos didto pakagulkola sa Station 2.

Giandam na sa kapolisan ang mga kaso nga atubangon ni Batiancilla ug Villacarlos diin usa niini mao ang alarm and scandal. (/WC)  (BANATNEWS)