60 ka kawani sa siyudad makadawat og incentive

CEBU, Philippines - Ang Cebu City Accounting Office mitugot na sa 60 ka mga empleyado nga nadestino sa Management Information Computer Services (MICS) nga makadawat sa ilang Charter Day cash incentives apan adunay nagtangag nga mga kondisyon.

Matud pa ni City Accountant Marietta L. Gumia nga usa sa maong mga kondisyon mao nga mag-agad lang sila kun kanus-a ganahi ang accounting office sa paghatag kanila og pahalipay nga cash.

Kini tungod kay wala makaabot sa satisfactory rating ang ilang performace dihang gihimoan sila og performance evaluation test.

Ang taas ug pasado nga rating sa performance evaluation, gikan sa Hulyo hangtod sa December sa miaging tuig maoy usa sa mga kondisyones nga gipangayo sa buhatan sa panalapi sa dakbayan aron makadawat ang kawani sa P7 mil nga   cash incentive niadtong buwan sa Pebrero.

Ang pagpang-apod -apod sa maong cash incentive sa mga empleyado sa City Hall gihimo isip pahinungod sa maayo nila nga performance sa panarbaho nga ilang nahatag ngadto sa siyudad.

Sumala pa ni Gumia nga ang guidelines nga giumol sa Program on Awards and Incentives for Service Excellence (PRAISE) Committee partikular na ang Guideline No. 2, nga nagtataw nga ang matag empleyado kinahanglang labing menus may   satisfactory rating sa panarbaho ug gawas niini wala gyuy madawdaw nga cash incentive ang usa ka kawani.

Kung makadawat ang mga personnel sa MICS, aduna sila’y pirmahan isip panaad nga andam sila nga mo-refund kung aduna’y mo-kuwestiyon puhon sa bahin sa cash incentive nga ilang nadawat. (BANAT NEWS)