Gitigbas angol sa papa sa kapuyo

CEBU, Philippines - Nalandig sa tambalanan ang usa ka lalaki human kini tigbasa sa amahan sa iyang kapuyo atol sa kasumaran sa pagkamatay sa Ginoo niadtong Biyernes Santo sa alas 3:00 sa hapon didto sa sitio Lintungaba, barangay Ilaya, lungsod sa San Fernando.

Ang biktima mao si Romeo Cabucayan, hingkod, residente sa maong dapit kinsa nakaangkon og mga samad tinigbasan sa iyang lawas.

Samtang ang suspetsado mao si Feliciano Pardillo, 69, silingan sa biktima ug amahan sa kapuyo ni Florencia, hingkod, nga kapuyo sa biktima.

Si PO1 Cleofas Cabrera sa pakighinabi sa Banat News  nagkanayon nga base sa imbestigasyon ni SPO1 Francisco Salubre, nasayran nga   si Pardillo giingong wala makauyon kang Cabucayan nga nahimong kapuyo sa iyang anak.

Sa wala pa niya tigbasa ang biktima, si Pardillo miadto sa gipuy-an niini uban ni Florencia unya gipahungaw niya ang iyang kalagot ug kapungot sa iyang umagaron pinaagi s a pagsinggit nga “unsa di mo manglayas kay pamatyon ta mo!”    .       Ang biktima nga wala makabantay, nakalitan busa wala makalihok ug wala makadagan hangtod nga gihapsan siya makadaghang higayon sa pinuti sa suspetsado ug maayo nalang kay wala siya maintimano.

Human   sa pagpanigbas si Pardillo mitahan dayon ngadto sa kagawad sa ilang barangay nga si Cristito Delima.

Uban sa mga tanod nga sila si Roberto Abella, Mario Monlerona ug Remegio Sabellano, si Pardillo gidala ni Delima ngadto sa San Fernando Police Station ug gitugyan sa kapolisan.

Ang mga tigpaniid nagkanayon nga kun nabugtoan pa sa kinabuhi ang biktima hayan nga mahisama siya sa Ginoo kinsa nakabsan sa kinabuhi didto sa krus sa bukid sa Kalbaryo untop gyud alas 3:00 sa hapon niadtong Biyernes.

Hinuon mas arang-arang ang kang Cabucayan kay pinuti ra man , ang kang Kristo kay gipapas-an pa og krus, dayon gihapsan ug gilatigo og mga tunok, ug samtang gilansang nga nagbitay na sa krus gibuslotan pa gyud ang mga kilid pinaagi sa bangkaw, unya gipainom og suka hangtod nga nabugtoan sa kinabuhi.

Hayahay si Cabucayan kay nadala man sa tambalanan ug wala magping-it sa sakit sa init lahi kang Kristo. (WC)(BANAT NEWS)