Sugat mabulokon, mga beach resorts gidugok sa mga tawo

CEBU, Philippines - Sama sa milabay’ng mga tuig liboan ka mga tawo ang mitambong sa Sugat sa lungsod sa Minglanilla.

Ang Santos nga Misa alang sa Sugat gisugdan alas 3:00 sa kaadlawon ug wala makapakgang sa mga tawo ang pagbundak sa kusog nga uwan diha sa sports complex sa barangay Ward I, Poblacion.

Mga alas 4:00 sa kaadlawon nasugdan ang programa sa Sugat diin dunay gipahigayong estorya kabahin sa Sugat diin tumong niini aron pasabton ang mga kabataan sa kahulogan sa Sugat.

Base sa gisaysay nga ang Sugat o Pasko sa Pagkabanhaw ni Hesuskristo usa ka dakong kapistahan sa tanang Simbahang Katoliko hinungdan nga dunay ipahigayong Santos nga Misa sa dili pa mahitabo ang panagtagbo ni Birhen Maria ug Hesus.

Gisaysay usab ang kabahin sa pasyon sa krus kung giunsa sa pagsakit si Hesus aron matubos ang tawo gikan sa sala.

Sama usab sa milabay’ng tuig sa dili pa magsugat ang rebolto ni Hesus ug Maria dunay presentasyon sa panag-away sa kangitngit ug kahayag.

Sa Sugat karong tuiga ang kangitngit girepresentaran kini sa usa ka dakung Agila ug ang kahayag nagpresentar kini sa lider sa mga anghel nga si San Miguel Arkanghel.

Wala gihapon mawala ang nabantog nang presentasyon sa Minglanilla nga may batang anghel nga tuyong ibitay nga mosugat sa Birheng Maria.

Ang pagtuotuo sama sa naandan wala gihapon mawala tungod kay giupawan sa mga buwak sa mga debotos ang karo.

Si Supt. Timmar Jamio Alam, hepe sa kapolisan sa Minglanilla nga nahinabi sa Banat News kagahapon nagkanayon nga generally peaceful ang selebrasyon gawas lang sa duha ka tawo nga nabiktima sa pagpanguot.

Sayo sa buntag kagahapon ang baybayon diha sa Larawan, barangay Poblacion, dakbayan sa Talisay napuno sa mga tawo.

 Ang magsuong Marites Mabuyo, 46 ug Sonia Sumalinog, 65 nga mga manindahay og mga barbecue ug kinilaw diha sa Larawan nagkanayon nga alas 5:00 pa sa buntag daghan na kaayong tawo nga nangaligo diha sa dagat ug gani mga alas 9:00 pa lang kagahapon sa buntag hurot na ang ilang tindang barbecue ug ang ilang tindang kinilaw hapit na usab kini mahurot.

Si Eve Larawan ,54, sa Larawan beach nagkanayon nga nangabang siya og kapin sa 100 ka mga lamesa aron usab iyahang paabangan og P200 matag usa.

Matag pampublikong beach resort sa Talisay dunay gibutang nga mga polis nga magbantay ug mga sakop usab sa Talisay Reaction Emergency Action Team (TREAT).

Susamang talan-awon usab ang nakita sa ubang beach resorts sa Lapulapu, Liloan ug Naga. (BANAT NEWS)