Tensyon miulbo sa Lawaan II

CEBU, Philippines - Pila na ka semana ang milabay nga nahilom ang tensyon diha sa lote ni Atty. Raul Sesbreño sa barangay Lawaan II, dakbayan sa Talisay apan kagahapon sa buntag miulbo na usab ang laing tensyon dihang ang mga sakop sa Alima-ong misulod sa nahisgutang lote ug nagpabarog og estraktura.

Usa sa tag-iya sa balay nga naapil sa gipahigayong demolisyon kaniadto sa mga Sesbreño mao ang giila lang sa pangalan nga “Elsa” kinsa sakop sa Alima-ong kinsa daling miikyas tungatunga sa tensyon.

Nahitabo ang binunlotay human ang mga sakop sa Alima-ong nagdumili sa pagkuyog sa mga polis sa ilang presinto hinungdan nga pugsanon silang gisikop ug gitanggong sa detention cell.

Ang mga natanggong mao sila si Ramon Eldon Noel, 63, taga sitio Cogon, Camomot, dakbayan sa Carcar ; Bernardino Nipa, 44, taga Guindaruhan lungsod sa Minglanilla; Benjamin Aleonar, 57, taga Cogon, Carcar City; Lorenzo Barazon Jr., 40, Upper Cogon, Carcar City; Ricardo Plariza, 55, Upper Inayawan, dakbayan sa Sugbo ug Rissah Amahan, 37, taga Lawaan II, Talisay.

Sila si Noel, Nipa, Aleonar Barazon ug Plariza giingong mga Alima-ong warriors kinsa atol sa pagkahitabo nagsuot og camouflage uniform nga nagbaton sa ilang pangalan ug tribu. Wala hinuoy nakuhang hinagiban gikan kanila.

Ang pag-umangkon sa abogadong Sesbreño nga caretaker sa nahisgutang lote nga si SFO1 Ramiro Sesbreño kinsa gipasanginlang namusil ug nagpasalba   kang Efren Oros o Kalir Oros, 43, sakop sa Alima-ong ang gitanggong usab ngadto sa Minglanilla Police detention cell.

Si Ramiro nakuhaan og usa ka kalibre .45 nga pistola nga may walo ka buhing bala ug napakyas pagpakita og permit to carry firearms outside of residence (PTCFOR) apan duna kini lisensiya sa maong armas.

Apan matud sa hepe nga bisan pa og dunay kompletong dokumento si Ramiro dili kini pwedeng mopagimaw sa iyang armas ngadto sa publiko ilabi na dunay daghang mga tawo diha sa palibot.

Si Supt. Eddie Recamara, hepe sa kapolisan sa Talisay sa pakighinabi sa mga tigbalita nagkanayon gibadlong sa gwardiya ang maong grupo pagsulod sa maong lote apan wala mopatuo.

Gipasabot sa hepe nga ang ilang pag-adto sa lugar mao lang ang pagmentenar sa kahapsay ug kalinaw apan mihulagway kining “illegal trespassing” ang gihimo sa mga Alima-ong ug miesplikar nga “reasonable force” ra ang ilang gigamit tungod kay wala mopatuo ang maong mga tawo sa mga awtoridad.

Lakip sa mitabang sa kapolisan sa Talisay ang mga sakop sa Special Reaction Unit (SRU) nga gi-pullout gikan sa Minglanilla tungod sa Sugat-Kabanhawan Festival.

Si Amahan sa pakighinabi sa mga tigbalita nagkanayon nga ang balay ni “Elsa” wala maapil sa writ of demolition maong angayan lang nga pabarugon kini og balik, nangangkon si Amahan nga ang ilang katungod nalatid sa Akta Republika 8371 kon “The Indigenous Peoples Right Act of 1997.”

Sa laing bahin, si Oros mipasangil kang Ramiro nga mipusil kaniya ug nagpasalba apan ang pusil sa maong bombero wala makabuto, mipasangil sad siyang nagsuot og bullet proof vest ang maong bombero ug mihagad pa kaniya og duwelo.

 Apan ang maong pasangil gihimakak ni Ramiro dihang nahinabi kini sa mga tigbalita. Matud ni Ramiro nga ang grupo sa Alima-ong misulod lang diha sa lote sa iyang uyoan ug wala mamati nga gibadlong sa gwardiya.

Si Ramiro mipasangil nga si Oros mitakilid kini dihang miabot siya ug ang mga panday nga nagpabarog sa estraktura mikuha og bara de kabra ug giingong misuway og hamag ngadto kaniya hinungdan mihulbot siya sa iyang pusil pagdepensa sa iyang kaugalingon.

Si Ramiro nagkanayon nga sigehan sila og bato apan dili sila makakita sa mga tawong mamato. Matud usab niya nga ang PTCFOR sa pusil ipadala pa kini sa iyang uyoan nga abogado.

Ang abogadong Sesbreño kinsa atoa sa Manila nga nahinabi sa The Freeman igsuong pamantalaan sa Banat News nagkanayon nga mouli siya aron sa pagsusi sa nahitabo.

Matud niya nga posibleng mopasaka siya og tukmang kaso batok sa mga misulod diha sa iyang lote. Gimandoan niya si Recamara sa pagsikop sa mga tawo nga misulod diha sa iyang lote ug dili ang iyang pag-umangkon nga si Ramiro maoy sikopon. (BANAT NEWS)