Unom napusilan ug nadunggaban

CEBU, Philippines - Upat ka mga insidente sa pagpamusil, tulo niini sa siyudad sa Sugbu ug duha sa pagpanunggab ang nahitabo sukad niadtong Huwebes Santo hangtud kagahapon. Apan matud ni Cebu City Police Office director Melvin Buenafe nga ang maong mga hitabo mga isolated nga insidente ug wala kini makahatag og apekto sa malinawong pagsaulog sa Semana Santa.

Ang ulahing insidente nahitabo mga alas 8:00 sa buntag kagahapon diha sa One Citilink Terminal sa barangay Pahina Central dihang ang service firearms sa security guard nga si Edison Hoyohoy, 32-anyos, aksidenteng mibuto ug ang bala miigo ngadto kang Carilito Panonche, 30.

Sa imbestigasyon sa kapolisan nasuta nga si Panonche nagpahigayon sa iyang trabaho isip collector diha sa terminal samtang si Hoyohoy nadestino isip gwardiya diha usab sa terminal.

Si Hoyohoy paingon nang mo- off sa iyang duty ug dihang gitunol niya ang 12- gauge nga shotgun ngadto sa iyang karelibo nga si Clin Michael Porosuello kalit mibuto ang armas ug miigo sa sawog sa terminal ug mibanda ang mga bolitas sa lawas ni Panonche.

Si Panonche daling gidala diha sa Cebu City Medical Center ug gipagawas usab dayon kini. Si Hoyohoy boluntaryong mitahan kang PO1 Richie Guillivan. Sa laing bahin, usa ka 25-anyos ang nakaangkon og samad pinusilan sa iyang tuong palad ug kinatawo human pusila niadtong Huwebes sa gabii diha sa dalan Cyco Cabreros, barangay Basak-San Nicolas.

Ang biktima mao si Gerbi Caruana, residente sa maong dapit kinsa giingong gipasanginlan sa suspetsadong si Renato Tabuada, 36, residente usab sa maong dapit nga maoy mikuha sa manok igtatari. Si Caruana mihimakak sa mga pasangil apan gisukmag hinuon kini sa suspetsado ug napusilan. Ang suspek miikyas samtang gidala sa CCMC si Caruana.

Laing pagpamusil ang nahitabo diha sa dalan Humabon, barangay Carreta, dakbayan sa Sugbo niadtong Huwebes sa gabii diin usa ka Junjun Obiedo ug Eddie Canque, ang napusilan sa wala mailhing lalaki. Si Obiedo nakaangkon kini og samad pinusilan sa iyang tuong bat-ang samtang si Canque tapsing lang sa tuong paa.

Sa laing bahin, duha ka lalaki ang nalandig sa tambalanan human dunggaba kagahapon sa kaadlawon diha sulod sa usa ka videoke bar sa Osmeña Boulevard, barangay Camagayan ug niadtong Huwebes sa gabii diha sa Bayabas Extension, barangay Mambaling.

Sa barangay Camagayan ang biktima mao si Jake Morados, 22, kinsa gidunggab sa usa ka wala mailhing lalaki diha sa dughan ug tiyan samtang natulog sa maong imnanan.

Ang laing biktima mao si Johnny Osorno, 24, taga Bliss, Labangon dihang nadunggaban ni Arturo Sobrevilla, 30, residente sa dalan A. Lopez, Labangon. Samtang nalandig sa tambalanan ang usa ka Rolando Quinto, 46, taga barangay Bae lungsod sa Sibonga dihang kalit gipusil sa usa ka wala mailhing lalaking nangita og gasolina. (BANATNEWS)