Buhing Kalbaryo 2012 malampuson

CEBU, Philippines - Kapin sa tulo ka libo ka mga tawo ang misaksi sa tinuig na nga Buhing Kalbaryo niadtong Biyernes Santo dinhi sa dakbayan sa Sugbo.

Usa kini ka buhing paghulagway sa pasyon ug kamatayon ni Hesukristo diin mokabat dul-an dosentos ka mga kabatan-onan gikan sa Barangay San Nicolas Proper, Calamba ug Guadalupe ang misalmot niini.

Si Mayor Michael Rama mapasalamaton sa katawhan lakip na sa mga turista nga misaksi niini ug gikalipay usab niya og maayo ang maayo nga dagan sa panahon.

Ang pasundayag nagsugod pagkabuntag nga nanukad sa San Nicolas Parish Church ug gisunod dayon ang Via Crucis ug kini natapos pagkahapon diha sa Parokya sa Mahal nga Birhen sa Guadalupe kung diin gihimo usab ang mga eksena sa kamatayon ni Hesus sa krus.

Nagkanayon si Rama nga naandan na gyud nga matag tuig aduna gyuy mosaksi nga mga turista sa Buhing Kalbaryo.

Matud pa sa mayor nga maisip na usab nga tourist attraction ang maong kalihukan matag Semana Santa.

Dugang pa niya nga sensiro gyud ang mga tawo sa pag-penetensya gani ang uban niini nisakripisyo gyud og lakaw sa rota sa via cruces.

Gidayeg usab ni Rama ang hapsay nga pagkadala sa dagan sa trapiko kung diin temporaryo lang kini nga mabalda sa higayon nga moagi na ang mga magdudula apan nabalik ra dayon kini sa normal matag human sa usa ka eksena partikular na sa istasyon sa krus.