Liboan ang gipaabot nga mosaksi sa Sugat

CEBU, Philippines - Gipaabot nga liboang mga Katoliko ang modagsa diha sa Cebu Metropolitan Cathedral sa ipahigayong prusisyon ug Santos nga Misa karong adlawa sa pagsaulog sa ‘Domingo sa Pagkabanhaw’ o Easter Sunday.

Tanang simbahan sa Archdiocese sa Sugbo ang mopahigayon og Santos nga Misa karong kaadlawon isip pagsaulog sa katapusang adlaw sa Semana Santa o pista sa pagkabanhaw.

Magsentro ang selebrasyon sa Archdiocese sa Sugbo sa mahitabong Sugat presentation and procession karong alas-3 sa kaadlawon diin iparada ang imahe ni Hesukristo ug inahan nga si Maria nga Birhen.

Human sa prosesyon, ang duha ka imahe uban sa mga deboto molahos didto sa Cathedral diin saulogon ang usa ka Santos nga Misa.

Mismo si Arsobispo sa Sugbo Jose Palma ang mangulo sa maong espesyal nga misa.

Samtang higpit nga seguridad ang ipatuman sa pagpahigayon sa Sugat-Kabanhawan Festival sa lungsod sa Minglanilla karong adlawa (Domingo).

Ang kalihukan sa kasaulogan anha ipahigayon sa oval sa sports complex sa Ward I, barangay Poblacion. Ang Sugat magsugod alas 3:00 sa kaadlawon ug nianang pagkabuntag isunod dayon ang mga kalihukan sa Kabanhawan Festival.

Si Supt. Timmar Jamio Alam, hepe sa Minglanilla Police Station sa pakighinabi niini sa Banat News kagahapon mibutyag nga dunay ipakatap nga mga sakop sa Special Reaction Unit (SRU), kapolisan gikan sa Cebu Provincial Police Office (CPPO), Provincial Intelligence Branch (PIB), K9 sa Philippine Drug Enforcement Agency (PDEA), mga sakop sa 78th Infantry Battalion (IB) ug mga Civilian Volunteer Organization diha sulod sa oval.

Matud ni Alam nga dunay ibutang nga tulo ka mga Police Public Assistance Center (PPAC) sulod sa oval ingon man mga tanod.

Matag tuig sa pagpahigayon sa Sugat sa Minglanilla hugopan gyud kini sa liboan ka mga tawo. Karong tuiga matud ni Alam gilauman usab nilang modagsa ang daghang mga tawo nga mosaksi sa Sugat ug motambong sa Kabanhawan Festival.

Kagahapon sa kagabii (Sabado) dunay gipahigayong disko diha sulod sa oval nga kabahin gihapon sa Kabanhawan Festival. (BANATNEWS)