CEBU, Philippines - Gipaubos sa tulo ka bulan o 90 ka adlaw nga preventive suspension ang acting Jail Warden sa Cebu Provincial Detention and Rehabilitation Center (CPDRC) tungod sa giingong pagpahigayon og party sa usa ka binilanggong mayor sa Aklan diha sa sulod sa maong prisohan.
Kini human sa gihimong tigom sa mga komitiba sa lalawigan sa Sugbu nga mituki sa maong reklamo dihang napamatud-an nga aduna gyuy gihatag nga special treatment ang jailwarden nga si Napoleon Miranda ngadto sa mayor sa Aklan nga si Alfredo Arcenio.
Si Arcenio nabilanggo human kini gitumbok nga nakapatay sa usa ka tigbalita sa ilang lalawigan.
Sumala pa sa report sa TV Patrol Central Visayas kagahapon sa hapon gipagawas ang desisyon sa gihimong imbestigasyon batok ni Miranda sa committee on discipline and investigation.
Matud pa sa maong report nga duna pay mga babayeng gitugotang makasulod sa maong bilanggoan.
Ang maong desisyon gipirmahan ni Gov. Gwendolyn Garcia diin masuspenso si Miranda sulod sa tulo ka bulan.
Nasayran nga adunay migawas nga report nga nakuha sa CCTV camera sa CPDRC nga si Arcenio nagkig-party uban sa jailwarden niadtong Marso 24 diha sa maong bilanggoan.
Sa milabay’ng semana usab, nasuspenso ug nag-atubang og kasong administratiba ang usa ka jail guard human usab kini nakit-ang nagkigkuyog ni Arcenio nga nangaon sa usa ka mahalong restaurant human sa motambong sa hearing diha sa korte. - BANAT NEWS