CEBU, Philippines - Gimanduan sa Department of Education (DepEd) ang mga magtutudlo ug prinsipal sa pangpublikong tunghaan sa paghatag gyud sa report cards sa mga tinun-an bisan wala sila makahatag sa amotan.
Si DepEd-7 acting regional director Carmelita Dolangon miluwat ning maong kamanduan human siya makadawat og daghang reklamo gikan sa mga ginikanan dinhi sa Sugbo ug sikbit nga probinsiya tungod kay may mga maestrang wala mohatag sa report cards sa ilang mga anak kay wala pa sila makahatag sa kompletong amotan.
Subling gipahinumduman ni Dolangon ang mga prinsipal ug magtutudlo nga wala tugoti ang pagpangolekta og amotan sa mga tinun-an sanglit kun duna may amotan boluntaryo lang kini.
Giawhag niya kadtong mga ginikanan nga pugson pagpabayad sa amotan sa pagduol sa iyang buhatan aron imbestigahon ang gireklamong magtutudlo.
Giklaro usab niini gidili ang mga maestra ug bisan na ang mga prinsipal nga maoy mangunay og dawat sa amotan. Ang mga opisyales sa Parents and Teachers Association (PTA) ra maoy gitugotang mohimo niini.
Gipasalig ni Dolangon ang patas ug makiangayon nga imbestigasyon batok niadtong mga magtutudlo ug prinsipal nga ireklamo sa mga tinun-an ug ginikanan pagpamugos og kolekta sa amotan. - BANAT NEWS