Manokan naugdaw P300 mil danyos

CEBU, Philippines - Mikabat sa P300 mil kantidad sa sunog nga miugdaw sa   Twin Tower Poultry farm uban sa mga manok nga sulod niini, didto sa barangay Liboron, sa lungsod sa San Fernando niadtong Sabado sa alas 10:50 sa gabii. Ang negosyante nga si Marcelino Co maoy tag-iya sa naugdaw nga poultry farm.

Si SPO2 Victor Cuyno sa San Fernando Police Station mibutyag sa Banat News   nga nadawat nila ang alarma nianang alas 10:10 sa gabii ug ang kawani sa maong farm nga si Devina Frias maoy nakapahibawo sa kapolisan kalabot sa maong sunog.

Sa pasiunang imbistigasyon nasayran nga ang gwardiya nga si Eugene Oporto nag- roving sa palibot sa maong poultry farm ug iyang nadiskobrehan nga nabuslot ang luyong bahin nga bongbong sa farm dapit sa storage nga pundohanan sa plastic ug mga trapal.

Unya mao nalay iyang namatikdan nga mikalit og ulbo ang kayo nga dali kaayong mikaylap tibuok palibot sa maong poultry farm ug nahurot pagkapaig ang mga manok niini nga may 108 mil ka ulo. Ang mga sakop sa kabomberohan inabagan sa kapolisan padayon pa karon sa ilang subsob nga imbistigasiyon aron sa pagtino sa hinungdan sa maong sunog.

Gitakda usab nga imbistigahon ang mga kawani niini ilabina kadtong mitrabaho atol sa sunog. Walay gikataho nga naangol o nakalas sa maong sunog gawas lang sa kaliboan ka mga manok nga na litson. - (BANAT NEWS)