Provincial assessor miretiro na

CEBU, Philippines - Dungan sa pagkapupos sa buwan sa Marso ning tuiga miretiro usab ang hepe sa Cebu Provincial Assessor’s Office nga si Engr. Anthony Sususco.

 Kini personal ang gitug-an ni Engr. Sususco sa mga sakop sa media atol sa gipahigayong dispedida party sa iyang mga sakop ngadto kaniya sa iyang buhatan niadtong Biyernes.

 Gipasalamatan usab ni Engr. Sususco si Governor Gwendolyn Garcia gumikan sa mga pamaagi nga gihimo sa gobernador nga nakapataas sa koleksyon sa lalawigan nga maoy kasangkapan nga nakadawat siya og pasidungog sa buhatan sa Bureau of Local Government Finance ubos sa Department of Finance isip Best Performing Assessor of the Province sa tibuok Central Visayas.

Matud niya nga human sa iyang pag-retiro isip kawani sa Kapitolyo, buot pa siyang moserbisyo sa publiko pinaagi sa pagpapili isip opisyal sa lungsod sa Catmon, ang iyang lungsod nga natawhan.

Hinuon giklaro ni Engr. Sususco nga niining higayona wala pa siya makahukom kun unsang posisyona ang iyang daganan sa umaabot piniliay sa tuig 2013.

Gitumbok ni Sususco nga ang nakaingganyo kaniya sa paglansar sa piniliay sa sunod tuig mao si Gobernador Garcia. Kini tungod kay iyang nakita ang maayong pagdumala sa Gobernador sa lalawigan sa Sugbo nga lahi ra kaayo sa mga nangaging mga gobernador.

Dugang pa ni Sususco nga buot niyang sundon ang pamaagi ug sistema nga gisagop ni Gobernador Garcia kun mapili siyang opisyal sa lokal nga kagamhanan sa Catmon.

Matud niya nga ang kasinatian niya sa pagdumala ni Gobernador Garcia maoy iyang kopyahon aron matagamtaman sa taga Catmon ang makabuhong nga kalamboan sa ilang lungsod. (BANAT NEWS)